NAUHAK TLA KAN PIANGTHAR THEI PART-III

Part-II siar hmai aw...  

Ṭhal caan a hung thleng, khawsik caan a liam, kum tla a hung thar thlang, BB tla kum kua a rak kim ve zo. An kohhran in camping kumkhat vawikhat an neih ṭheu mi caan tla a hung thleng. An kohhran in Gospel camping an neih ding thu cu BB tla in a rak thei ve. A lungawi tukih a khir rero. “Yay..,yay.., camping ka kai ve ding,” tiah khir phah in a au zawk rero. Asinan, camping kai theitu ding hmin pawl an lak tikah BB cu camping nakah luh an siang ve lo. Ziangahtile a ni cu kum kua lawng a rak si ruangah a si. Kum hleikhat ihsin lawng luh ngah a rak si. Mithli haal cingin a dil rero nan an rak siang lo. “Na nauhak tuk lai, midang na hnaihnawk menmen,” an rak ti. BB cu riahsia zetin a um ih a thupten a mitthli a hnul rero. A lung thin sungih a riahsiatnak pawl cu Pathian in a mangsak ringring. Cutin gospel camping lut ngah loin a um. BB bangin Pathian thu na zir cak caan ah zir ngah lo in na um ve dah maw? Caan ṭha na nei mi kha Pathian thu ngainak ah hmang ṭheu aw maw.  

BB cu nauhak a si ko nan a beidawng duh lo. Pathian in nauhak thlacamnak a theihsak ringring ti a thei ruangah a duhbik mi, “piantharnak” co thei ding cun a thlacamnak ah a dil peh ringring. BB vanṭhatnak bik cu, pi le pu duhdawttu le thlacamsaktu a nei ringring ruangah a si. A pi tla cun a tu le fa pawl hrangah thlacamsak hi a baang dah lo. Cu tlukih pi ṭha, nu ṭha a si. Cawntlak zet mi a si. BB bangin thlacamsaktu pi le pu, nu le pa na nei ve maw? Na nei lo pang asitlalen na hrang ih cawl lo ih thla lo camsaktu Thlarau Thianghlim a um a si (Rom 8:26 ). Na riahsia hlah aw maw. 

 

Cutin kum le caan a hung herliam vivo, BB tla kum hleithum a rak kim ve thlang. Tlawng tla phun riat a kai rero thlang. Asinan, rundamnak thu hi a thinlung sungah theifiangnak ngaingai a nei thei hrih cuang lo. Jesuh in in rundam ti mi cu a theituk ko nan, amah ah theifiangnak ngaingai kha a rak um thei cuang lo. Hell ram tlak ding kha a ṭih thluahthlo lai thotho. BB vekin Jesuh rundamnak thu thei thluh ko nain rundam si theifiangnak neiloin na um ve maw? Na beidawng hlah aw maw.

NAUHAK TLA KAN PIANGTHAR THEI PART-II

Part- I siar hmai aw...Part I

BB cu nauhak lungfim kum riat mi a si ve zo tikah, hellram thu le vanram thu tla a thei zo. Hell ram ah cun a mit dahlomi meisa alh hluahhlo mi le a thi theilo mi pangan pawl tla an um ih, cu pawl in an keu rero ding ti tla a thei (Mark 9:48). Hell ram feh ding hi a ṭih tuk. Ziangahtile hell ram cu piangthar lo, Jesuh neilo pawl fehnak ding a si (Thuphuan 21:8). BB cun Jesuh thawn vanram nuam ih kumkhua um ding mi hi a cak zet mi a si. BB vekin Jesuh hnen na um ve duh maw?

BB cu hell ram feh ding a ṭihtuk ruangah, “Ziangtin ka piangthar ve thei ding?” ti mi thu lawnglawng a ruat thlang. A ruahnak ah cun nauhak pawl hi an piangthar thei ding a zum lo. Ziangahtile nauhak an si lai ruangah upa deuhhnu, kum sawmthum lanhnu pawl hrang lawngah a rak ruat. Amahten a thin sungah a ruat buai rero thlang. Zohman le a sut ngam fawn lo. Cutin thinhar thupnak nei in a um ringring. BB bangin hell ram tlak ṭih thupnak neiin thinbang in na um ve pang maw? Amah bangin pianthar duhnak na nei ve maw?

Nikhat cu BB amahtein a um rero laiah a nute le a pute a kiangah an ra ih mithianghlimlawr thu an rel rero. Mithianghlimlawr ti mi cu, Jesuh in Amah a zumtu pawl lole piangthar pawl vanram ih a laksoh ding mi sim duhnak a si (1 Thessalonians 4:17).  A Nute cun BB cu capoh phah in, “Nang cu mi thianghlimlawr ah na tel fawn lo ding ih, ‘kum sarih harsatnak*’ sungah na lut ding. Vanram kai na duh tlalen Setan in a lo kai hrem ta lo cun na kai thei lo ding,” tin, ṭihdingin a sim rero. BB cun a ṭih tuk. Ziangtin a nute a sawn ding ti tla a thei lo. Asinan hell ram tlak a duh lo tuk ruangah, “Vanram ka kainak ding asiahcun ka tuarsuak ko ding,” tiah a ti. Asinan, a thinlung sungah cun ṭihnak lawnglawng in a khat. 

BB cun Hell ram tlak a ṭih tuk ruangah, Pathian hnenah hitin thla a cam thlang, “Bawipa, zangfahten upa ka si tikah i piangthar ter aw maw, hell ram feh ka duh lo,” a ti zawk rero. Ziangahtile, nauhak a si lai ruangah pianthar a ngah hrih lo dingah a ruat ruangah a si. BB bangin na piangthar theinak ding hrang Pathian hnenah thlacamnak thawn na dil ve dah zo maw? Asilolen, “Ka nauhak tuklai, pianthar a ngah hrih lo ding,” ti’n ruahnak dik lo na nei ve pang maw?  

NAUHAK TLA KAN PIANGTHAR THEI (Part-I)

                     Khua pakhat ah nauhak nute harhvang zet pakhat a rak um. Amah cu kumriat mi a si. A hmin cu BB a si ih nu le pa a nei nawn lo. A pi le pu hnen ah a um ih an duat ngaingai. Cule Pute le Nute tla a nei. Anmah pawl an um ruangah a um tla a har dah lo. Anmah pathum tein an lek ṭheu ih, an nuam thei ngaingai. A pi le pu cun lehnak tla a phunphun an leih. Cutin a nun hi nuamzet in a hmang ṭheu.

BB cu a pi le pu in an duattuk ruangah nu le pa a nei nawn lo ti hman a mangaw nawn lo ṭheu. A pi le pu cu Pathian ṭihzah zettu an si. An tu le fa pawl in Pathian thu an lung lo pang ding tile rundamnak an co lo pang ding ti hi an phanzetmi a rak si. Cutikah ṭhaal tlawngpit tinten biakinn ih nauhak crusade umnak ah an fehter ringring. BB tla hi nauhak asinan rundamnak co ngah ding a duh ve tuk ruangah nauhak crusade tinten lungawi ten a feh ve ringring.

Vawikhat cu an khuaah nauhak crusade a rak um. Pathian thu pawl an zir ṭheh hnuah crusade zirhtu sayamah in, nauhak crusade a zirtu hmuahhmuah kha tettikhan ding ah a fial hai. BB kha cun tettikhan lo ih um kha a duh ve lo. Ziangahtile an sayamah kha a hmaisawng ih a ṭih ruangah a si. Asinan, rundamnak thu cu a lungthin sungah a rak fiang ngaingai lo. An sayamah cun hitin nan sim ding tiah a ti hai, “Hi hlanah cun Setan fa ka siih, a tu-ah cun Pathian fa ka si zo. Pathian hmin ka thangthat,”. 

Cutin khawmzan a hung kim ih, nauhak pakhat hnu pakhat tetti an khan rero. Nauhak pate pakhat tla cu ningzak a nei tuk ruangah a sim ding hmuahhmuah linglet ṭheh ko in a sim. “Hi hlanah cun Setan fa ka siih, a tu-ah cun Pathian fa ka si zo. Pathian hmin ka thangthat,” ti ding mi kha “Hi hlanah cun Pathian fa ka si ih, a tu cu Setan fa ka si zo. Pathian hmin ka thangṭhat,” a ti ta riai. 

Mipi an hni vualvo. A thinphang tuk ruangah a si. Culaiah BB kha cun a thinlungten, “Ka sim ve duh pei maw, sim ve lo ding? Ka ning le a zak fawn,” tiah thu a ruat ciamco.  Asinan an Sayamah mithmai zoh phahin a simter mi cu byheart in a va sim ve. 

Cui zan cu a hngilhthei nawn lo a si. Ziangahtile, a kaa cun mipi hmaiah sim hman sehla a nun sung muril ah rundam si theifiangnak a um lo ruangah a si. A pi in len thungai thu ah a ruat ih, “Kan tu le fa pawl rundam an si ti thei hi a hnangam um tuk,” a ti rero. BB in len thu ngai thu a sim ngam fawn lo. Cutin cui zan cu thin nuam lo zet cing in BB cu inn lam ah a tlung ta. BB vekin thinlung sungril ah theifiangnak um lo pi’n “ka piangthar, rundamnak ka co zo,” na ti ve dah maw?  Mah le mah bumawk hi a ṭha lo mi a si.

CHRISTMAS IH SULLAM

Nikhat cu unau hnih Amy le Ken ti mi an rak um. An unau ten an lek rero laiah lamzin ih sihte a rualrual ih feh mi an hmu. Amy cun mangbangnawn in, “Alaa.., sihte pawl cu an buai dan hi..ziang an tuah si pei?” a ti. Ken cun, “Cake an hmu ih an phur tum a si khi,,” a ti. Cutin an unau hnih ten sihte cake phur rero lai cu an zoh rero. 

An zoh rero laiah cun pacing pakhat a ra ih, an kiang ih um mi tidai laknak kha a run ong. Cutin tidai cu lamzin sihte pawl umnak ah a ra luang rero thlang. Amy le Ken cu an thin a phang tuk. Zangahtile tidai in sihte pawl a feh that theh ding ruangah a si. Amy cun a aw neih hmuahhmuah thawn, “TLAN ZANG UH!! TLAN ZANG UH!! Tidai in a lo fen that theh hai ding,” ti’n a auh rero. Asinan, sihte pawl cun an thei lo. Lamzin ih a um mi sihte zaten an thi theh. Amy cu a riahsia tuk ih a tap rero. “Ka lo sim rero nan si. Ziangah nan ngai duh lo..” ti’n a tap rero. Ken cun zangfah nawn in, “Amy, na sim mi an theithiam lo ruangah si kha, tap nawn hlah aw…” ti-ah a lem. Ziangruangah Amy sim mi an thei thiam lo?

An unau hnih ten inn an tlung ih, Amy cun a nu’i hnen ah sihte pawl thu cu a sim rero, “Tlan uh, tin ka sim rero hai nan in ngai duh lo,” ti’n riahhsia zetin a sim. Cutikah a nu cun, “Amy, nang cu minung na si. Cutikah na sim mi an theithiam lo mi a si. An mah sim thei ding cun an mah bang sihte na si a tul si. Sihte na si duh maw?” a vun ti. Amy cun,”Si duh lo,” a ti. Nangteh sihte na si ve duh maw?

Amy nu cun, “Thu sim ding ka lo nei hai. Christmas tla a nai cuahco thlang. Mipi pawl cu Christmas ih sullam thei lawn laksawng le thil thar lei ding ruatin an buai lala ding. Riahsiaza a si,” ti’n riahsia nawnin a sim hai. Amy cun, “Nunu, Christmas cu ziang a si?” ti’n thei cak nawnin a vun sut. Anu cun, “Pathian in leitlun mi pawl a run zoh tikah sualnak thawn lawnglawng in an nung ti a hmu. Cule an sual thawn hell an feh ding ti tla a thei. Asinan, Pathian in a duhdawt tuk hai ih, hell an feh ding a siang lo. A rundam duh hai. A duhdawtnak thu pawl tla a sim rero nan, minung pawl cun an theithiam thei lo. Cutikah amah Pathian sawn kha minung pawl rundam thei ding ah minung ah a ra cang” ti’n a sim rero. 

Amy cun, “Kei tla sihte ah cang thei sehla cu ka run thei hai ding nan si ti,,…” a vun ti. Anu cun, “Si tuk e..! Kan nih pawl tla Pathian in in duhdawt tuk ruangah a fapa neihsun rori kha minung ah a ra cangter ih, kan mah bangin naute vekin a ra suak. Cule a ra upa tikah kan mah hrangah thinglamtah parah a thi hnu ah thihnak neh in a tho sal. Amah Jesuh a zumtu hmuahhmuah cu kumkhaw nunnak an neinak ding ah a si,” ti’n fiangten Khrih ih ratnaksan pawl a sim hai. 

Amy cun lungawi ten, “Nunu, Christmas ih sullam cu ka thei zo. Pathian in leitlun mi pawl hrang a fapa in pek mi lawm-nak a si,” a ti. Anu cun, “Na sim mi a dik tuk. Christmas ti mi ih sullam ngaingai cu, Pathian in a fapa in rundamtu ding ih in pek mi lawmnak hi a si.

Mi tampi cu Chrsitmas sun hrang angki (kawr) thar an nei lo ruangah khawm tla an peih lo. Christmas tla an hmang peih lo,” tiah riahsia nawn in a sim rero. Ken cun mak ti nawn in, “Nunu, ziangah angki thar nei lo ruangah Christmas cu an hmang duh lo? Amah Pathian in laksawng thabik Jesu in pek zo ko si. Kan neicia mi angki pawl fai ten hruk ih Pathian hnen ah lungawi thu sim ding kan si lo maw?” a vun ti. Anu cun, “Situk famteh Ken…! Curuangah kan nih zumtu cun Christmas hi Pathian sunlawinak le thangthatnak ah kan hmang sawn ding a si,” ti’n thaten a sim hai. Amy le Ken cun a nu’i sim mi thu pawl cu an thinlung sungah an cingkeng ringring. 

 

Na Fale Midang Thawn Tahthim Hlah (ALCC Senior Class Drama)

Nauhak Rundamnak Thuthangtha Sim Dan Idea (1)