NGAIDAMNAK PHUNHNIH

THINLUNG TAKTE IH JESUH A HAWLTU CUN AN TAWNG

NAUHAK TLA KAN PIANGTHAR THEI PART-IV

Part-III Siar Hmai aw... (Click aw)

Ṭhal tlawngpit caan a hung thleng lala thlang, nauhak pawl tla caan lawng an nei thlang. Kumtin vawikhat an tuah ṭheu mi nauhak crusade tuah caan tla a ra kim thlang. Tuiṭum nauhak crusade an tuah mi cu BB hrangah kumdang thawn bangaw loin, simfiang theilo khawp ih lungawinak thlen kum a si. Ziangahtile, a nauhak lai ihsi a rak theifiang cak zet mi le Pathian hnen ih thlacamnak thawn a rak dil rero mi piantharnak kha, hi ṭum crusade-nak ah a fiang ngah vuarvi ruangah a si. 

BB cu thuzirnak hmunah cun a va feh ih, kilkhat ih a um mi tohkham ah to phahin Pathian thu ṭhaten a ngai rero. An Sayamah cun, Jesuh ih rundamnak thu pawl tahṭhimnak thawn a vun sim thlang. “Pathian in a lo duhdawt hai tuk ruangah hell ram nan tlak a sianglo ih a Fapa Jesuh sungah a lo ret hai. Cutikah nan nih pawl cu Jesuh sungah nan um zo a si,” tiah a sim rero hai. Cule an sayamah cun Bible a lakih cu mi sungah pen a ret ih, Bible cu tokham parah a vun ret. Hitin thu a sut hai, “Pen Bible sung ih ka ret mi kha a tu khawiah a um?”. Cule BB le nauhak dang pawl cun, “Tohkham parah,” tin phurnawnin an au. Cule an sayamah cun TV parah a Bible cu a ṭhin lala, “Tuteh khawiah a um?” ti’n a sut lala. “TV parah,” ti’n phurzet in tuan ih an au hnakih ring in an au lala. Cule Sayamah cun, “Aww, nan sim mi a dik. Bible sungah pen a um zo ruangah Bible ka retnak hmunih kipah pen a um ve vivo naksan a si. Cuvekin nan nih pawl tla, Pathian in Khrih ah a lo ret zo ruangah, Khrih umnak hmun van cu nan um nak ding hmun a si,” ti’n a simfiang hai. 

Cule ve ten, BB cun a thinlung ten, “Eii.. Pathian in Khrih sungah in rak ret zo si maw…! Kei cu Khrih sungah ka um zo si maw..?,” ti’n mangbangzetin thu a ruat rero. Cule an Sayamah cun, “Khrih cu khawinah a um? Hell ah maw van ah?” ti’n a sut hai. BB khal cun, “Van ah” ti’n ringpin a rak sawn ve. Cule an saymah cun, “Khrih cu hell a tla kem?” ti’n a sut lala hai. BB cun phurnawn in ringpin, “Tla lo ding!!,” tiah a rak sawn. An sayamah cun, “Aw.., a dik mi a si. Khrih cu ziangtik hmanah hell a tla lo ding. Cule Amah sungih um tu pawl tla an tla lo ding. Khrih hell a tlak lawngah an tla ve ding fang mi hi a si. Asinan, Khrih cu hell ziangtik hmanah a tla dah lo ding,” ti’n a vun simfiang vivo.  BB cun cui thu a thei tikah mak ti phah cingin, “Kei cu Khrih ah ka um zo, Khrih cu hell a tla lo ding ruangah, kei tla ka tla ve nawn lo ding, kei cu Khrih sungah ka him zo si,” ti’n lungawi zetin Pathian zangfahnak thawn rundamnak cu a fiang zo a si. 

BB cun Jesuh Khrih cu a rundamtu ah a zum ih a cohlang zo ruangah kumkhaw nunnak a nei zo a si (Johan 3:16). Jesuh zum ih cohlang hi vanram kainak lole rundamsinak a si. Rundamnak thu theih men lawng kha rundamnak a rak si lo. Mai hrang rori ih zum ih cohlang ding a rak si. BB bangin Jesuh rundamnak thu a thei ih a zum tu, a cohlangtu na si ve ah cun kumkhaw nunnak na co ve ding a si.

BB cu kum riat a rak si lai ihsi a rak theihcak thluahthlo mi rundam si theihfiangnak kha kum hleithum a si ah a fiang ngah riai. Kum riat a si lai ihsi thlacamnak ih a rak hlan mi kha Pathian in a theihsak ringring ih a thlacamnak a sansak a si. BB cu a lungawi tuk ih Pathian hnenah lungawithu tla a sim rero. BB hi na lungawipi ve maw? Ziangruangah BB a lungawi? 

BB Sayamah ih sim mi hi ṭhaten ruat ve aw…

BB lawng hi Khrih sungah Pathian in a ret mi a si lo, nangmah tla a lo ret ve a si. BB in rundam thei fiangawknak a nei zo bangin nangtla in na nei ve thei a si. Amah Pathian rori in hell na tlak a siang lo ih Khrih sungah a lo ret ve zo. Cui thu cu BB bangin na zum ve asilen Khrih hnen ah kumkhua in na um ve ding  a si. Hell na tla lo ding. Hell ihsin na luat ve ding a si.

Bible byheart ding: Kolosa 3:3 “Nan thi zo ih, nan nunnak taktak cu Pathian ahcun Khrih hnenah thuh in a um a si.”

BB in kum upa zo pawl lawng piangthar thei ding le rundamnak co thei ding ih a rak ruah mi kha a si lo ti a thei thlang. Amah rori ih nun ihsin Pathian in, “Nauhak pawl tla rundam an si thei ti le an piangthar thei,” timi kha a sim fiang a si. Hell ram tlak a rak ṭih thupnak pawl hmuahhmuah kha a hlo vuarvi ṭheh ih, “Vanram cu keimai ta a si zo,” a ti thei thlang. BB bang in, “Vanram cu ka ta a si ve zo a si,” na ti thei ve thlang maw?

BB cu a thinlung sungten a lungawi tuk ih, a theihfiang mi rundamnak thu cu a um menmen pi thei nawn lo. An innhnen nauhak dang pawl hnenah a mah a theifiang dan le a sim thiam ve dan tawkin a sim ve hai. A theihfiang mi rundamnak thu kha a um pi men thei lo a si. Midang pawl tla in a theih mi, “Rundamnak” thu hi theifiang ve haiseh ti hi, a duhbik mi a si thlang. Nangtla na theifiang zo mi Jesuh ih rundamnak thu hi na rualpi pawl hnenah na sim ve thei a si. Cu cu Jesuh ih duhbikmi tla a si (1Timothy 2:4).

NAUHAK TLA KAN PIANGTHAR THEI PART-III

Part-II siar hmai aw...  

Ṭhal caan a hung thleng, khawsik caan a liam, kum tla a hung thar thlang, BB tla kum kua a rak kim ve zo. An kohhran in camping kumkhat vawikhat an neih ṭheu mi caan tla a hung thleng. An kohhran in Gospel camping an neih ding thu cu BB tla in a rak thei ve. A lungawi tukih a khir rero. “Yay..,yay.., camping ka kai ve ding,” tiah khir phah in a au zawk rero. Asinan, camping kai theitu ding hmin pawl an lak tikah BB cu camping nakah luh an siang ve lo. Ziangahtile a ni cu kum kua lawng a rak si ruangah a si. Kum hleikhat ihsin lawng luh ngah a rak si. Mithli haal cingin a dil rero nan an rak siang lo. “Na nauhak tuk lai, midang na hnaihnawk menmen,” an rak ti. BB cu riahsia zetin a um ih a thupten a mitthli a hnul rero. A lung thin sungih a riahsiatnak pawl cu Pathian in a mangsak ringring. Cutin gospel camping lut ngah loin a um. BB bangin Pathian thu na zir cak caan ah zir ngah lo in na um ve dah maw? Caan ṭha na nei mi kha Pathian thu ngainak ah hmang ṭheu aw maw.  

BB cu nauhak a si ko nan a beidawng duh lo. Pathian in nauhak thlacamnak a theihsak ringring ti a thei ruangah a duhbik mi, “piantharnak” co thei ding cun a thlacamnak ah a dil peh ringring. BB vanṭhatnak bik cu, pi le pu duhdawttu le thlacamsaktu a nei ringring ruangah a si. A pi tla cun a tu le fa pawl hrangah thlacamsak hi a baang dah lo. Cu tlukih pi ṭha, nu ṭha a si. Cawntlak zet mi a si. BB bangin thlacamsaktu pi le pu, nu le pa na nei ve maw? Na nei lo pang asitlalen na hrang ih cawl lo ih thla lo camsaktu Thlarau Thianghlim a um a si (Rom 8:26 ). Na riahsia hlah aw maw. 

 

Cutin kum le caan a hung herliam vivo, BB tla kum hleithum a rak kim ve thlang. Tlawng tla phun riat a kai rero thlang. Asinan, rundamnak thu hi a thinlung sungah theifiangnak ngaingai a nei thei hrih cuang lo. Jesuh in in rundam ti mi cu a theituk ko nan, amah ah theifiangnak ngaingai kha a rak um thei cuang lo. Hell ram tlak ding kha a ṭih thluahthlo lai thotho. BB vekin Jesuh rundamnak thu thei thluh ko nain rundam si theifiangnak neiloin na um ve maw? Na beidawng hlah aw maw.

NAUHAK TLA KAN PIANGTHAR THEI PART-II

Part- I siar hmai aw...Part I

BB cu nauhak lungfim kum riat mi a si ve zo tikah, hellram thu le vanram thu tla a thei zo. Hell ram ah cun a mit dahlomi meisa alh hluahhlo mi le a thi theilo mi pangan pawl tla an um ih, cu pawl in an keu rero ding ti tla a thei (Mark 9:48). Hell ram feh ding hi a ṭih tuk. Ziangahtile hell ram cu piangthar lo, Jesuh neilo pawl fehnak ding a si (Thuphuan 21:8). BB cun Jesuh thawn vanram nuam ih kumkhua um ding mi hi a cak zet mi a si. BB vekin Jesuh hnen na um ve duh maw?

BB cu hell ram feh ding a ṭihtuk ruangah, “Ziangtin ka piangthar ve thei ding?” ti mi thu lawnglawng a ruat thlang. A ruahnak ah cun nauhak pawl hi an piangthar thei ding a zum lo. Ziangahtile nauhak an si lai ruangah upa deuhhnu, kum sawmthum lanhnu pawl hrang lawngah a rak ruat. Amahten a thin sungah a ruat buai rero thlang. Zohman le a sut ngam fawn lo. Cutin thinhar thupnak nei in a um ringring. BB bangin hell ram tlak ṭih thupnak neiin thinbang in na um ve pang maw? Amah bangin pianthar duhnak na nei ve maw?

Nikhat cu BB amahtein a um rero laiah a nute le a pute a kiangah an ra ih mithianghlimlawr thu an rel rero. Mithianghlimlawr ti mi cu, Jesuh in Amah a zumtu pawl lole piangthar pawl vanram ih a laksoh ding mi sim duhnak a si (1 Thessalonians 4:17).  A Nute cun BB cu capoh phah in, “Nang cu mi thianghlimlawr ah na tel fawn lo ding ih, ‘kum sarih harsatnak*’ sungah na lut ding. Vanram kai na duh tlalen Setan in a lo kai hrem ta lo cun na kai thei lo ding,” tin, ṭihdingin a sim rero. BB cun a ṭih tuk. Ziangtin a nute a sawn ding ti tla a thei lo. Asinan hell ram tlak a duh lo tuk ruangah, “Vanram ka kainak ding asiahcun ka tuarsuak ko ding,” tiah a ti. Asinan, a thinlung sungah cun ṭihnak lawnglawng in a khat. 

BB cun Hell ram tlak a ṭih tuk ruangah, Pathian hnenah hitin thla a cam thlang, “Bawipa, zangfahten upa ka si tikah i piangthar ter aw maw, hell ram feh ka duh lo,” a ti zawk rero. Ziangahtile, nauhak a si lai ruangah pianthar a ngah hrih lo dingah a ruat ruangah a si. BB bangin na piangthar theinak ding hrang Pathian hnenah thlacamnak thawn na dil ve dah zo maw? Asilolen, “Ka nauhak tuklai, pianthar a ngah hrih lo ding,” ti’n ruahnak dik lo na nei ve pang maw?  

NAUHAK TLA KAN PIANGTHAR THEI (Part-I)

                     Khua pakhat ah nauhak nute harhvang zet pakhat a rak um. Amah cu kumriat mi a si. A hmin cu BB a si ih nu le pa a nei nawn lo. A pi le pu hnen ah a um ih an duat ngaingai. Cule Pute le Nute tla a nei. Anmah pawl an um ruangah a um tla a har dah lo. Anmah pathum tein an lek ṭheu ih, an nuam thei ngaingai. A pi le pu cun lehnak tla a phunphun an leih. Cutin a nun hi nuamzet in a hmang ṭheu.

BB cu a pi le pu in an duattuk ruangah nu le pa a nei nawn lo ti hman a mangaw nawn lo ṭheu. A pi le pu cu Pathian ṭihzah zettu an si. An tu le fa pawl in Pathian thu an lung lo pang ding tile rundamnak an co lo pang ding ti hi an phanzetmi a rak si. Cutikah ṭhaal tlawngpit tinten biakinn ih nauhak crusade umnak ah an fehter ringring. BB tla hi nauhak asinan rundamnak co ngah ding a duh ve tuk ruangah nauhak crusade tinten lungawi ten a feh ve ringring.

Vawikhat cu an khuaah nauhak crusade a rak um. Pathian thu pawl an zir ṭheh hnuah crusade zirhtu sayamah in, nauhak crusade a zirtu hmuahhmuah kha tettikhan ding ah a fial hai. BB kha cun tettikhan lo ih um kha a duh ve lo. Ziangahtile an sayamah kha a hmaisawng ih a ṭih ruangah a si. Asinan, rundamnak thu cu a lungthin sungah a rak fiang ngaingai lo. An sayamah cun hitin nan sim ding tiah a ti hai, “Hi hlanah cun Setan fa ka siih, a tu-ah cun Pathian fa ka si zo. Pathian hmin ka thangthat,”. 

Cutin khawmzan a hung kim ih, nauhak pakhat hnu pakhat tetti an khan rero. Nauhak pate pakhat tla cu ningzak a nei tuk ruangah a sim ding hmuahhmuah linglet ṭheh ko in a sim. “Hi hlanah cun Setan fa ka siih, a tu-ah cun Pathian fa ka si zo. Pathian hmin ka thangthat,” ti ding mi kha “Hi hlanah cun Pathian fa ka si ih, a tu cu Setan fa ka si zo. Pathian hmin ka thangṭhat,” a ti ta riai. 

Mipi an hni vualvo. A thinphang tuk ruangah a si. Culaiah BB kha cun a thinlungten, “Ka sim ve duh pei maw, sim ve lo ding? Ka ning le a zak fawn,” tiah thu a ruat ciamco.  Asinan an Sayamah mithmai zoh phahin a simter mi cu byheart in a va sim ve. 

Cui zan cu a hngilhthei nawn lo a si. Ziangahtile, a kaa cun mipi hmaiah sim hman sehla a nun sung muril ah rundam si theifiangnak a um lo ruangah a si. A pi in len thungai thu ah a ruat ih, “Kan tu le fa pawl rundam an si ti thei hi a hnangam um tuk,” a ti rero. BB in len thu ngai thu a sim ngam fawn lo. Cutin cui zan cu thin nuam lo zet cing in BB cu inn lam ah a tlung ta. BB vekin thinlung sungril ah theifiangnak um lo pi’n “ka piangthar, rundamnak ka co zo,” na ti ve dah maw?  Mah le mah bumawk hi a ṭha lo mi a si.