Bible: John 8:1-11 (A suallai
fang ih kaih mi nunaunu le Jesuh)
Kan Bible bung le cang tarlan mi
hi kan theihlar zetmi a siih, theihkaunak hrangah kan sim asilen, Bible nganmi
hmaisa lam lole Bible hlunbik lamah cun hi thu hi Johan sung ih tello mi a si.
Bible sung ih um lomi a si, ti sehla a dikbik ding. Hrekkhat Bible zirhtu pawl
cun an sermonnak khalah uire nu thuanthu hi an sim lang duh lo hrim theu.
Ziangahtile Bible hlun ah a rak um lo ruangah a si (The Family
Devotional Study, NIV.p.917). Tuini ah cu mi cu kan sim tumbik mi a si lo, kan nih cun an thuanthu ihsin ZIR DING a um mi sawn kan zoh ding a si.
An thuanthu kan siar tikah,
Pharisai pawlin a suallai fang ih an kaihmi nunau nu kha Jesuh hnenah an hruai. Moses dan vekih sim ding asiahcun a sualpit mi mipa tla kha hruai tel ve ding a
si. Asinan an hruai tel lo. Ruahdan tamzet a um ko ding nan, an mah Juda
culture ah cun nunau hi zianghman ih an rak siar loh mi a si ruang ih hruai
tello, mipa sawn kha mithmai tha pe, tin tla kan ti thei. Hi thuanthu ihsin
character pathum kan hmu thei ih, cucu, Pharisai, Uire nu, le Jesuh an si.
Pakhat teten kan zoh hnik ding.
Pharisai:
Mah le mah fel awter le thianghlim
awter an si. Cule midang sualnak pholan tum le midang mualphohter duhnak thinlung
nei an si. Jesuh hnen ih uire nu an hruai tikah, thinlung thiang ih feh an
silo, Jesuh ih sualnak kaih ngah duh ah a si. Cule a mipa sawn an hruai lo
tikah tulai san mil ih kan sim asiahcun, milian mit hmai tha pek, thleibik nei
fihnungza thinlung putu an si.
Pharisai pawl ih lungput kan zoh
tikah, nang le kei thawn danglamawknak kan nei cuang lo. Fel awter, sual neilo
awter, mai thiamconak ding asiahcun midang mawhpuh mai, thleidan nei tuk mi kan
si. Thil pakhatkhat a tha mi tuah a si khalen thinlung ah beiseimi dang nei,
fihnungza thinlung neitu kan si. Pharisai nun hi kan nun a si. Pheh ding a um
lo.
Uire nu:
Misual a siih, a suallai fang kaih
mi tla a si. Amai lamah thiam thu rel ding zianghman nei lo le mahte runsuak aw
thei lo a si. A sualnak ruang ih mualphoh pit tawp ih mualpho a si. Khatlei
zawngah cun runtu tulzet le ngaidamtu, duhdawttu tulzet mi a si. Dinhmun sebik
ih ding rero mi a siih, a tulmi runtu le ngaidamtu cu milai hnen ihsin a hmu lo.
Zangfak umza a si.
Nunau nu hi a uire si, a phu tuk,
mualphoh lawlaw hai seuh, na ti pang maw? Hi nu hi nang le kei kan si. Pathian
hmai ah nang le kei cu misual mak tarei, uire, mah le mah runsuak aw thei lo, rundam
tu tul le kan sual pawl ngaidamtu tulmi kan si. Cung pawl cu milai hnen ihsin
kan ngah theilo, ziangahtile kan zate in hi nu kan si theh ruangah a si. Cule
milai ngaidamawknak cu rei a daih lo. Uire nu vek ih rundamtu, ngaidamtu tul
lawlaw kan si.
Jesuh:
Jesuh cun uire nu kha a rak
kawkin thilsual le fihnungza na tuah si, a rak ti lo. A zoh tikah nunau nu ih
tulmi a theihsak sawn a si. Nunau nu in tu fang ih a tulmi cu kawk le velh le
ti mualphobet a si lo, a sual ngaidamtu, duhdawttu le rundamtu a tul ti kha a
hmuhsak sawn a si. A rak judge mai lo. Jesuh cu duhdawttu lawng siloin mi
zawnruattu, zangfaktu, lainattu, ngaidam theitu le rundamtheitu Pathian asinak
khal kan hmu thei fawn a si. Jesuh in uire nu ih a tulbik mi duhdawtnak, sual
ngaidamnak le rundamnak a pek tikah, “Va sual nawn hlah,” ti hman tul loin a
par ih thatnak pawl a hmuhfiang ahcun, a tuah kel sual cu a tuahbet nawn lo
ding ti a fiang nasa.
Nang le kei khal uire nu vekin
Pathian in Jesuh fehtlangin in ngaidam ve a si. Kan sual hmuahhmuah in ngaidam
hleih ah, Setan sal sung ihsin khal in luatter zo a si. Sual sal sung ihsin
khal in luatter zo a si. Pathian in nang le kei hi kan sualnak ruangah thuten
in tum nawn lo, A fapa Jesuh parah sawn a thuthennak a thlengter zo a si. Hell
ihsin khal in luatter zo fawn a si. Cumi a theifiangtu nun ah cun, “Sual sung
ih nun leh duhnak a um nawn lo a si.” Ziangahtile Pathian ih duhdawtnak a
theifiang tuk ruangah a si. A phu lo cing ih ngaihdam, duhdawt le rundam asinak
a fiangtuk ruangah a si.
Ngaihdam a cozo tu, Khrih a zumtu
pawl cu Amah Khrih bang ih thanglian vivo ding hi in duh mi a si. Ziangkim kan
tuahnak ah Jesuh in uire nu par ih a thiltuah mi hi kan mang ringring kei uh.
Kan Pharisai zia kha hlawn ta hrat in Jesuh ih zia sawn kan nun ah kan lanter
thlang pei uh. Nun tla a hahdam sawn a si. Midang sualnak le mawhnak lawnglawng
hmu tum thinlung put neih cu ziangtlukin a har ding! Jesuh in in rundam tikah
hi vek thinlung thalo, Pharisai thinlung siava lak ihsin khal in runsuak theh a
si. Curuangah Khrih bang thanglian timi cu kaa lawng ih rel rero asilo, nun tak
ih hmansuah sawn hi a si. Midang kha kan sawisel lawk mai ding asilo, cuhnakin
Jesuh bangin an tulmi le an hei mi sawn kha hmuhthiamsak tum sawn ding kan si. Jesuh in ziangtin a ti ding? timi kha kan ruat sawn ringring pei uh.
Unau, Pharisai zia a si mi mah le
mah tha le fel ih ruat ih midang sualnak phorh hmang silo le uire nu vek ih mai
dinhmun theiih Pathian zangfahnak le duhdawtnak, rundamnak tulzia thei aw tu
kan sinak dingah le rundamnak le ngaihdamnak kan co hnu ah Khrih bangih
thangliantu kan si vivo nak ding ah kan zate parah Pathian in a tharin in
thlawsuah hram seh! Amen.
Posts
