Posts
Teacher: “Nan thotha maw?
Students: Tho tha.
Teacher: “Tuizing kan zir dingmi cu, Bible thu a si ding ih, kan hman rero mi Bible hi ziangtin kan nei? Biaknak dang cabu lakih a danglam hleice-nak ziang a si? timi a si ding.”
Teacher: “Bible ti can hi ziang a si?”
Student: “Cabu / Cazual.”
Teacher: “Bible hi ziang a si?”
Student1: “Pathian thu ngannak.”
Student2: “Thuanthu bu.”
Teacher: “Nan simmi a tha nasa. Bible hi milai le sersiammi ziangtinkim um thawkdan pawl, Pathian in milai a duhdawtzet ruang ih Jesuh hmangih thukham a ti famkim dan, in rundamnak le hmailam caan ih thilthlengding mi pawl simfiangnak Pathian thu ngannak cabu a si.”
Student3: “Ava tha ve!”
Teacher: “Ka kut ih cabu pahnih hi muslim cabu “Quran” le Mormon cabu, “Another Testament of Jesus Christ” timi “Khrih ih Thukham dang,” timi cabu an si. Himi cabu pahnih le kan Bible ih danglamnak ziang a si? Pathian thu a si, an ti veve fawn.
Student4: “An cabu cu a te deuh.”
Student5: “Kan Bible cu thutak a si.”
Teacher: 2 Timothy 3:16 hi kan zaten kan siar ta pei.
“Cathianghlim hmuahhmuah hi Pathian thawtkhumnak in pek a si ih, zirhawknak hrangah si seh, kawkawknak hrangah si seh, remthatawknak hrangah si seh, dingfelnak zirhawknak hrangah si seh, a hlawk a si.”
Teacher: “Kan Bible danglam hleicetnak a pakhatnak cu, Pathian ih thawtkhummi asinak hi a si. A pahnihnak cu, Thlarau Thianghlim kaihruainak in minung 40 pawlin hmun dangdang le caan dangdang ah an ngannan, kalh aw mi le sual mi pakhat hman a umlonak hi a si. Cule kumkhaw nunnak petheitu cabu khal a si. Biaknak dang cabu pawl cu a ngantu pakhat lawng an si hlei ah, kan Bible thawn kalh aw theh mi an si. Kan Bible hi kum 1500 ihsin 1600 rei nganmi a si.
Student6: “Bible sung ih bu 66 um pawl hi ziangtin Pathian ih thawtkhummi an si ti kan theithei?”
Teacher: “Tu hlan ahcun atu ih kan Bible hi hitin pakhat ih kawm mi a rak si lo. Cazual ih nganmi an rak siih, a dangdang an rak si. Bu 66 lak ih tello mi cabu dang tla tampi an um.
Teacher: “Bu 66 pawl lawng hi Cathianghlim, Pathian ih thawtkhummi tiih an ra pawmdan cu hitin a si. 4th Century zumtu pawlin Canon timi tahfung hmangin cabu pawl kha Pathian ih thawkkhum a si le silo tahnak an rak nei. Tahfung an tuahmi pass (ong) pawl cu Cathianghlim, Pathian ih thawtkhummi cabu a si, tiah an rak pawm. An tahnak ihsin bu 66 pawl lawng hi an rak pass (ong). An tahfung pawl cu hi hi an si.
1. Cabu ngantu hi apostle or Apostle pawl ih theihpitmi an si a tul. Thimnakah, Mark cu Peter ih theihpitnak in a ngan. Luke tla Paul ih theihpitnak in a ngan.
2. An sanlai ih Kohhran ih pawmpit mi a si a tul.
3. Pawmcia mi cabu pakhat le pakhat a kalhawk lo a tul. Thimnakah, Thuthangtha Thomas cu gospel cabu dang thawn a kalhawk ruangah an pawm lo.
4. Amah cabu lala in Pathian thawtkhum/ Pathian hnen ihsin a ra mi a sinak a langter a tul. Thimnakah, Catholic pawl ih an hman mi Apocrypha hi silent period, OT le NT karlak, Pathian in milai a biak lo caan ih nganmi asiruangah an pawm lo.
Teacher: “Canon tahfung cu tuih kan hman mi bu 66 pawl lawngin an rak pass. AD 363 ahkhan Laodicea Council pawl in Old Testament le New Testament bu 66 pawl lawng hi kohhran pawlin hmang dingin thu an rak thlah. Kan siarawlnak ding ah a sung ih um mi thu feh dan remaw in Genesis ihsin Thupuan tiang a dawtdawtten an ret ih, cule chapter(bung) le verse(chang) pawl tla an tuah a si.”
Teacher: “Nan fiangthei ko maw?”
Students: “Fiang nasa.”
Student7: “Bible study dan malte in sim thei maw?”
Teacher: “Thusuhnak thazet a si. Cathianghlim hmuahhmuah hi Pathian ih thawtkhummi kan ti tikah a original kha a sim duhmi a si. Tuisun ih kan hmanmi pawl hi translation, lehlinsalbet rero mi an si tikah, ngansual pang le lehsual pangmi a um thei. A cangthei asilen Bible pakhat lawng study nakah hmang loin lehlinmi dangdang tla siartel an tha a si.”
Teacher: “Bible kan siar tikah a sung um mi hmuahhmuah kha tuisan hrang hmancih tum ding a si lo. Kan theithiamnak dingah:
1. A ngantu zo a si?
2. Zo pawl hrang ah a ngan?
3. An nganlai caan ah ziangmi a thleng? (Historical background)
4. A simduh mi ziang a si?
5. Tuisan ah hmanpeh ding a si lai maw? timi pawl kan ruatta a tul a si.
Student8: “Arak thupi tuk a sisi”
Teacher: “Fianglo mi thusuhduh nei kan um maw?”
Students: “Um nawn lo. Kan lungawi.”
Teacher: “Asile thla ka cam dingih cutin kan bang ding.”
Source: Moody Handbook of Theology
Thusuhnak
1. Holy Bible le biaknak dang cabu danglamnak ziang a si?
2. II Timothy 3:16 ah ziang thu a um?
3. Bible hi kumziat rei anrak ngan?
4. Bible sung um bu 66 pawl hi ziangtin Pathian ih thawkkhum a si ti kan theithei?
5. Ziangruangah Thuthangtha Thomas cabu kha Cathianghlim ah an pawm lo?
6. Bible hi Pathian ih thawtkhum kan ti tikah ziangmi a sim duh?
7. Bible study tikah ziangmi pawl kan thei a tul?
