KHRIH NA ZUMNAK ZIANGTIN NA LANGTER?

Pathian zangfahnak in Laimi tam sawn cu Khrih zumtu, Pathian theitu kan si tiah zumnak kan nei. Amah Khrih thawn kan pehzawmaw ngaingai maw ti cu kan mah le Pathian karlak si sehla. Khrih zumtu asi ngaingaitu nun ahcun rahsuah mi a um tengteng theu. Rahsuah mi ziang a um lo asiahcun zumnak thi lole Khrih zumnak neilo ti thawn an bangaw a si (Jacob 2:17). Paul in Khrih a zumtu pawl hnen ih ca a kuat tik ah, “Ziangkim nan tuah mi ah Pathian sunlawinak hrang ah tuah uh,” arak ti (1Kor 10:31). Kan nitin nun kan khawsak dan, midang (midum, mirang, disability) kan biak dan, kan zoh dan, khawlak kan va suah ih kan va tlanlen dan, biakinn kan va um tik ih kan umdan ziangkim hi an tel theh a si. Mi tampi cu biakinn ih kan umdan le leng hnatuannak, khawlak ih kan umdan a dang viarviar theu. Ca ngantu pakhat cun, “Khrihtian a ti aw mi tampi cu leng kan va suahnak ah zumlotu, Pathian nung neilotu pawl vek in kan um,” arak ti. A sim mi hin ruah ding a ti tam nasa. Khrih zumnak kan nei mi hi ziangtin kan nunnak in kan langter ve? 

Vawikhat cu kan tlawnginn ihsin veng hnen pawl hnatuan dan zoh ih an hnen ihsin zir thei mi kan neih mi pawl zir ding in suahvahnak kan nei hai. Westcare Baptistcare SA kan va pal ih, cutawk ih hnatuantu pawl thawn tawnawknak kan nei. Homeless ti pawl le mi harsa bawm tul um mi a phunphun in an bawm hai ih, cutin mi harsa pawl rian hna an tuan hai. Khrih rundamnak thuthangtha khal a rem dan in an sim. Cutawk ih a tuantu hrekkhat pawl kha thusuhnak kan nei. “Ziangruangah hinah na um?” tihi kan suh mi cu a si. Pastoral care hna a tuantu pakhat cun, “kum 25 sung hinah ka umnak a si zo. Ka umnaksanbik cu Khrih zumnak ka nei mi hi mi harsa le bawmtul mi pawl bawmnak in ka langter duh ruang ah a si,” a ti. A tongkam cun ka nun I sawh nasa! Kei teh Jesuh ka zumnak hi ziangtin ka langter ve? Ka nitin nun ka hmandan I ruatkirtersal nasa! An mah pawl ih hnatuannak ruang ah Jesuh neilotu tiang in Jesuh anra neih phah ih, an mah lak ih hnatuan bawmtu thatha ah anra cang hai fawn a si. Khrih kan zumnak hi Biakinn tualsung ih kan nun dan hnak in a leng ih Khrih ziaza kan nun ih alangnak hin midang thinlung arak nehtuk sawn hi arak si. Hnatuannak ih kan tongkam hman duh zawng, kan tuah duh zawng, kan rel duh zawng, kan mah hnak ih nauta kan biak duh dan zawng kan ruatsal kei uh, Jesuh zumtu pakhat dinhmun in na di a riam maw? Ka di a riam maw? 

Cutin kan class cu hmundang ah kan fehsal ih, “Soul Food Community café” ah suncaw einak nei phah in, a dawr neitu deuhbik kawmnak kan nei lala. An dawr ih tuantu pawl cu volunteer theh an si. Dawr an tuah thawkdan simnak a nei tik ah, Jesuh Khrih rundamnak thuthangtha sim theinak ding ruat ih din mi a si thu in sim hai. A simbet mi cu, “Mi zozo khal kan rak welcome theh ih, an hmin le an in mi coffee duh zawng hminsin ka rak tum theh, cutin an ra tik khal ah an hmin in ka rak ko ih, an duh mi coffee rel tullo in ka rak tuahsak cih theu, cutin an mai inn vek rori in nuam an tiih inra pan vivo theu. Cutin customers tha nei vivo in tawnawk khawmnak tla neiin Jesuh ih thuthangtha share nak kan nei theu,” a ti. Atu hi church an din zo ih, Baptist Church of South Australia member an si hai a si. Tu ni tiang in zarhkhat vawikhat tawnawknak neiin Khrih thuthangtha reltlannak le kawmawknak an nei theu a si. Sim duhsawn mi cu, Jesuh an zumnak an lanter dan hi simple te asinan, tangdawrnak nun le duhdawtnak nun te thawn an ti lang ih, midang nun a nehtuk. Disability pawl khal siseh hnatuannak ih experience an neinak ding ah tiah an rak bawm hai ih, an tuahthei ding tawkte rak tuahter in, cutin Khrih an zumnak cu midang riannak in an langter. An nun ihsin cerhti nung a luangsuak rero a si. Zohthimtlak an va si em! Kan Laimi zumtu pawl kan zumnak kan langter ve dan thaten kan checkawk a tul nasa. A luangliam mi nun hnak in “ziang mi saw ka ngah thei ding,” “Ziangah in rawn duh lo, in biak lo, in veh lo, in pek lo, in upat lo,” ti sawn ah kan buai rero theu. Midang hrang ah ziang mi ka tuah thei mi a um ve, tiih midang rian duhnak nei sawn lo in kan mah sawn kha in rian ding kan duh theu. Khrih kan zumnak hi biakinn ri alan kei maw? Paul cun “Khrih thinlungvek nei ve uh” in ti. Khrih cu midang rian ding ah ara mi a si. Khrih thinlungvek kan nei lawng ah kan nun ihsin cerhti nung a luangsuak ve ding a si.

A netnak ah hi thusuhnak hi kan suhawk ciau keiuh. “Jesuh zumtu pakhat dinhmun in ka zumnak ziangtin ka langter? Lole hmailam caan ah ka zumnak ziangtin langter ka duh?” Kan nitin nunnak ah kan zumnak langter dan abangawk ciau lo ding. Mi hrek cu inn sungsang enkawlnak ah tla a si ding, mi hrek cu hnatuannak ih rinumnak in kan langter, mi hrek cu nupi pasal hnatuan bawmawknak in, mi hrek cu midang bawm tul mi bawmnak in, kan bang aw ciau lo ding. A hrek cu kan nun in kan ti lang maw ti tla ruat dah lo kan si men ding, a tlai cuang lo a si. Bible cang kan tarlar mi vek in, ziangkim kan tuah mi kip ah mai sunlawinak hawl lo in, Pathian sunlawinak sawn hawl in midang riantu kan si ciau pei uh. Amen!

NAUHAK UM LONAK KOHHRAN HMAILAM CU A TAWP A SI

Ministry hmuahhmuah ih thupibik cu Nauhak ministry a si. Ziangahtile an mah hi kan hmailei ih in hruaitu ding an si. Khawitawk kawhhran khal ih kan sim ringring theu mi cu, “Nauhak an thupibik” ti hi a si theu. Asinan, thupibik ih kan ret le ret lo cu kawhhran in nauhak hrang hna a tuandan par ah alang. Thupibik in ret hmansehla tuahnak in a lang lo cun thupibik ih ret lo thawn a bang aw asi. Cule nauhak pawl kum 18 an ra kim hnu biakinn thleng an um nawn tuk lo asile, cui kawhhran cun a tuah ding mi a tuah lo ih hlei ah a hmailam cu a tawp rero tinak a si. Children’s pastor Dale Hudson cun, “Mino kum 18-25 kohhran tlansantu rate a sang vivo, an kum a run upa vivo ih, an zumnak an tlansan vivo. A thawk ihsin zumnak ngaingai neilo in, an nu le pa ih sim mi vek an tuah ih, khawm ding ti caan ah an khawm, an mah nun sung ngaingai ah Khrih nei lo in, nu le pa ih zumnak an thlun men ruang ah, nu le pa ih sim thei nawn lo kum rual an run si cun tuah dan theu pawl hmuahhmuah kha an tlansan theh a si,” a ti. Nu le pa in ruah ding thukzet kan nei thlang. Nauhak/Kan fale biakinn thleng taima kan ti pawl hi an mah le Pathian karlak pehzawmnak an nei ngaingai ke maw? Nu le pa in ttih hrih ruang ah tuah ding ih kan fial mi pohpoh an tuah rero sung maw a si? An mai nun ah Jesuh an nei ngaingai ruang ah an tuah mi a si maw, asilo ahcun kohhran lawng silo an zumnak an tlansan vivo ding a si. Ruah ding a tam nasa. 

Hills Bible Church zingzawitu pawl cun, leitlun zumtu mi piangthar (Christian) 85% pawl hi kum 18 an kim hlan ih rundamnak cotu pawl an si a ti. Kum 18 tang khal ah kum 13 tang lei hi rundamnak an fiang a awl hleice ti a si. Kum 18 kan kim hnu cun khawruahnak a tam ih, duh mi, daw mi, a tam vivo, hnatuan tla tul vivo thawn kan thinlung in Pathian thu a ruat man nawn lo ih, kan taksa hrang tul mi sawn ah caan kan pe tam sawn ruang ah rundamnak thuthangtha ngainak hrang kan nauhaklai vek in kan pe thei nawn lo tinak a si. Cuiruangah Children’s Ministry hi kawhhran in a tak ih a ret thupit a tul ih, nauhak pawl ih zirhtu naibik le thabik a si mi inn lei ih a um pi tu, nu le pa, an mah umtu pawl thawn tuantlang, tanlak tlang hi a pawimawh ngaingai a si. Thupi ti men ih kan cemter asile kawhhran hmailam cu a tawp ding a si. Tu ih upa pawl kan hung upa vivo ding ih, kan tar vivo ding, kan thi leh ding, biakinn tiang midang then lole zuar a tul leh ding mi khi a si. Cu mi hnak ih riahsia umzet mi cu kan fale pawl hell feh ding mi hi a si.

BIBLE BU 66 PAWM A SI DAN TAWI

Bible kan ti tik ah cabu pakhat tin kan hmu tla a si men thei, asinan bu 66 a sung ah a um a si. Ziangtin hi mi bu 66 pawl hi Pathian ih thawkkhum an si tiah kan pawm, cabu dang pawl teh ziang ah Pathian ih thawkkhum an si ve lo, ziang mi tahfung si an hmang, ti pawl hi zumtu pakhat dinhmun in kan thei ding khi a thupizet. Bible hi Pathian ih thawkkhum, Amai hnen ihsi ara mi, sual theilo le palh theilo kan ti tik ah atu ih translation kan hman mi pawl a sim duh mi silo in, Amah Pathian thu, a hmaisabik ih a ngantu pawl hnen ih arak pek mi sawn kha sual thei lo le palh thei lo mi a si kan ti mi cu a si. Tuisan kan nei mi translation tampi cu let sual mi le hrelh mi a um hnuaihni thei ruang ah Bible study kan tuah tik ah version dang dang thawn zohtlang ih a sim duh mi theifiang tum hi a thupituk mi a si. 

Bible bu 66 kan hmang rero mi pawl hi ziangtin kan ra nei ti kan fiangnak ding ah hlanlai ca an rak ngan dan simnak kan nei ta ding. Hlan lai ahcun a tu ih cabu kan nei mi vek in cabu ih ngan a si lo ih, cazual in an rak ngan theu. Ca zual dang dang arak um ih, tu ih bu 66 pawl ih hlei ah cabu dangdang an ngan mi arak um. Cu pawl lak ahcun Peter ih nganmi thuthangtha cabu (The Gospel of Peter), Thomas ih ngan mi thuthangtha (The Gospel of Thomas), Apocrypha tvp tla an si. Asinan an zate in Pathian ih thawkkhum mi an si theh lo ih, hi mi cazual ngan mi tampi lak sung ihsin bu 66 kan hman rero lai mi pawl lawng hi Pathian hnen ihsi ara mi le thawkkhum mi an si tiah an rak pawm a si. Cumi hrang ah tahfung an rak nei. Cazual/Cabu pakhat Pathian ih thawkkhum asi le silo an tahnak pawl cu atangta pawl hi an si. 

1. A ca ngantu hi Apostle, Prophet lole Apostle pawl ih theipi mi an si maw, timi zohdiknak an nei. Thimnak ah, Thuthangtha Luke asile Paul ih thei pinak in a ngan mi a si. Moses, Jeremiah pawl asile Pathian ih hril mi prophet an si.

2. Cazual/Cabu hi kohhran hmaisai pawl ih pawm mi le hman rero mi an si maw? Thimnak ah Thukam Hlun sung le Thukam Thar ih um cabu tam sawn hi bu 66 an hril hlan ihsin kawhhran hmaisa pawl in an rak hmangcia rero zo mi, a hleice in Paul ih cakuat pawl tla cu anrak hmang rero cia mi a si.

3. Cazual/Cabu pakhat le pakhat kalh aw ding asi lo. An sim duh mi message a bangaw ding a si. Thimnak ah Thuthangtha Peter le Thomas cabu pawm asilonak cu Thuthangtha dang pali pawl thawn an thuken mi le Khrih Thuthangtha an sim mi a bangawk lo, an kalhawk tik ah hnawl an si. Cuvek thotho in Aprocrypha cabu pawl tla hnawn an sinak san a si. 

4. Amah cazual/cabu lala in Pathian hnen ihsi ara mi asinak a langter/ fiangter ding a si. Thimnak ah Moses asile, “Pathian in Moses hnen ah hitin a ti,” tivek pawl, “Pathian in Jeremiah hnen ah” tivek pawl, Pathian hnen ihsi ara mi asinak kha amah cabu lala in a ti fiang mi kha pawm a si.

Simcia zo bang in khimi tahfung pawl khi an pass theh asile himi cabu cu Pathian ih thawkkhum mi asi tiah an rak pawm. Pathum dik hmansehla a dang ah a dik locun hnawl thotho an si. Enoch cabu pawl tla ngai nuam le siar nuamzet an si ko nan, Pathian ca thinghlim sung ih siartel a rak si lo. Asan cu khi mi tahfung a ong lo ruang ah a si. Pathian hnen ihsi ara mi cabu a si tiih tampi an rel mi pawl lak ah tu ih kan hman mi bu 66 pawl lawng hin an rak ong (pass) ih, AD 397-400 ah the Council of Carthage in bu 66 pawl hi an rak nem hnget a si. Cutin tuini tiang Bible bu 66 pawl hi, ahleice in Protestant pawl in kan ra hmang vivo a si.

Sources: 

The Moody Handbook of Theology

Introduction to the History of Christinity

HOSANNA SULLAM ZIANG A SI?

VANCUNGMI PAWL IH KEN MI "MI HMUAHHMUAH HRANG THUTHANGTHA"

Bible: Luke 2:8-12

Bible cang tarlan mi kan siar asile tuu khaltu pawl kha vancungmi pawl hnen ihsin "Leitlun hrang thuthangtha" thei hmaibiktu an si ti kan hmu ding. An san lai ah tuu khaltu pawl hi mi te naubik pawl ih hnatuan a rak si. Zohman ih ngaihsak lem lo mi, puai tivek khal ih an sawm dah loh mi, thawmhnaw hruh ding tha le thianghlim kha neilo, an kiang khal ah mi pawl an um peih dah lo a si. An hnen ah vancungmi pawl in "Leitlun hrang thuthangtha" an sim hmaibik ding khi an ruahban loh mi mangbangza a si. Asinan, Pathian cun a duhdawt hai. Zo hman ih an theih hlan ah an hnen ah Pathian in "Jesuh" a suah thu a sim hai a si.

Setan cun na thinlung ruahnak ah "Pathian in cu mi, kha mi vek minung lawng a duhdawt" tiah thuphan a lo sim ding. Nang cu duhdawt mi si ve lo vek in a lo suah ding. Thutak cu hihi a si, "Pathian in mi zo vek khal a duhdawt theh. Mi farah siseh, milian siseh, mi tha lo siseh, mitha siseh, mi aa siseh, mi fim siseh, a duhdawt theh a si. Ziangvek ram ihsi a ra mi le a suak mi, midum, mirang, ziangvek tong hmangtu sikhal awla a lo duhdawt a si.

Christmas hin Pathian ih duhdawtnak cu fiangzet in in sim. Ziangahtile Jesuh cu mi hmuahhmuah hrang ah a ra ruang ah a si. Tuini ah upa nauhak, mino deuh lai tla na si thei, mi pawl ih zianghman khal ih siar lem loh mi le mi thupi lem lo ih an lo ruah mi tla na si thei. Cu ang pawl cu Pathian hrang ah an thupi lo. Ani cun na si dan ten a lo pawm ih a lo duhdawt, cuiruangah a vancungmi pawl in, "Tuini ah David khua ah nan hrangah Rundamtu a suak. Amah cu Bawi Khrih a si," tiah thuthangtha an rak phuang. Jesuh na hrang ah a ra a si.

Pathian in lo thlawsuah seh. Amen.

(Source: Jesus Christmas)

“ATULNAK AH NA FALE SUPPORT THIAM AW”

“Nu le pa pawl, nan faale pawl kha thinheng dingin tuah hlah uh. Cu ai ah Khristian nundan ziaza le zirhawknak thawn cawm uh.” Efisa 6:4 

Kan Bible cun fale pawl in nu le pa upat le ttihzah ding in zirh, cucu Christian nun ih um ding ih in duhsak mi a si. Milai dan ah kan nu le pa pawl ttihzahtlak an silo hman ah ttihzah le upat ding ih zirhmi kan si. Cuti kan ti tikah nu le pa in fale pawl a tullo tiang ih controltuk le kan ram cozah vek ih uk ding a sim duh mi a si lo. Kan uk aw pang sual theu. Bible cun, “Nu le pa pawl, nan fale pawl kha thinheng dingin tuah hlah uh,” a ti a si. “Thinheng dingin tuah hlah uh” a ti tik ah, nauhak pakhat a duh mi ngah lo ruang ih thinheng kel men a sim duhmi a silo. Thinnatter, nu le pa par ih thin cem, beidawng, ningna, ninghang, nu le pa par ih beisei mi zianghman nei nawn lo ko dinhmun  ih um mi, a sim duh mi a si. Hi dinhmun an thleng asile ziangvek khal in zirh rero in, sim tum rero khal awla, a ngah nawn lo ding. Pathian thu na sim mi tiang khal an thinlung sung ah a lut thei nawn lo ding tinak a si. Hi dinhmun thleng ding kha Pathian ih duhlo mi cu a si. Cuiruangah fale par ih nu le pa tuanvo hi a sang zet.

Laimi nu le pa tampi ih kan palh theu mi cu, kan fale ih ruahnak le feeling hi thupi ah kan retsak theu lo mi hi a si. Theithiamsak tla kan tum dah lo. Ziangah kan siar lo. Cuiruangah an thinharnak pawl an nu le pa hnen ah in sim dah lonak san khal a si. Kan mah vek tho ih duhzawng, duh lo zawng nei, lungawi thei, riahse thei an si ti hi kan theisak ve a thupi ngaingai. Kan mah nu le pa kan lungawi ih kan hna a ngam cun kan fale pawl tla an hnangam in an nuam theh ding ah kan ruat pang theu. A rak si ringring theu lo. Nu le pa ih duhdan lawnglawng ih umter tum in, kan control tum ciamco asile, a netnak ah thinnatnak le thincemnak a thleng ding ih, kan mithli tlaknak ah an cangsal ding. Cuiruangah kan fale pawl hi a tuldan le a tulnak hmun ih kan support thiam a tul zet. Rualpi vek ih kan biak caan a um a tulvek in, an ruahnak, an duhzawng ziangvek a si ti tla sut thiam ih, ngaisak thiam nu le pa kan si ding a thupi ngaingai. Culawng a silo, kan fale level kan ban theinak ding ah kan update awktla a tul ve ringring. Daithlang a ngah lo. 

Kan Bible in kan fale pawl cu Christian nundan ziaza le zirhawknak thawn cawm uh, in ti. “Nan duhdan le nan feh theu dan vek in cawm uh,” a ti lo. Amah Pathian lala thei ih a thutak ih umtu, Pathian lawng rinsantu fale si ding ih zirh le kaihhruainak a sim duh mi a si. Cumi cangthei ding cun kan zirh ding mi Pathian thu kha kan mai nun ah a fiang a tul hleiah hmuh ding a um a tul ve a si. Kaa lawng in "cutin khatin tuah aw," tiih kan duhtawk asile Pathian zumnak neilo fale ah anra cang theh thei a si. Ziangahtile a zirhtu nu le pa nun ah an hmu lo ruang ah a si. Na duhdan lawnglawng ih umter na tum hai asile an thin na cemter ding ih, au rero khal awla an thinlung sung ah a lut nawn lo ding. Rundamnak an co ding mi hman co lo ding ih khamtu nu le pa kan si ziar ding. Cuiruangah kan fale pawl hi a tulnak hmun le a tuldan vek ih kan support thiam a tul ngaingai. Cutin na tuahthei asile na sim mi pawl an lung a lut ding ih, Pathian thu kha thaten na zirh theihai ding a si.

Anetnakah, nu le pa si hi thil awlaizet asilo, Pathian in fate thawn in thlawsuah cengmang cu kan ni khal in a hnen tiang hruaithleng ih, Amah Pathian hrang caan a hmangtu an si ve theinak ding ah nu le pa dinhmun in tuanvo kan nei a si. Pathian in a lo bawm ding a si.